बाको च्यातिएको छाला

कविता उषा आचार्य December 19, 2019, 8:27 am

---

बा,

बरु टुनीले बर्षैपिच्छे बोक्रा फेर्छ

ढुकुरले पटकपटक जोडी फेर्छ

सबैको जुनी फेरिन्छ बा

म देखिरहेछु

हजुरको च्यातिएको छाला

वषौँदेखि उस्तै छ

कहिले फेर्नुहुन्छ ?

बा कति लोभी हुनुहुन्छ ?

भन्नुहोस् छालाको मूल्य कति छ ?

न गरा गहिराउँदा गहिराउँदै हजुरकै जीवन गहिराइदिने

हलोको फालीले बताउन सक्यो

न त हजुरको फाटेको कुर्कुच्चामा

प्याट्टप्याट्ट पिट्ने चप्पलले भन्न सक्यो

न त खेतका कान्लामा

मुसाका दुला टालिएझैँ टालिएका

लुगाले बताउन सक्यो

त्यसैले बा

हजुर नै बताउनुहोस् न

छालाको मुल्य कति छ ?

बा म पर्खिरहेछु

तपाइँको फेरिएको छाला हेर्न

सायद छालासँगै जीवन पनि फेरिन्छ कि ?

तर, अहँ

बरु टुनीले वर्षैपिच्छे बोक्रा फेर्छ

ढुकुरले पटकपटक जोडी फेर्छ

सबैको जुनी फेरिन्छ बा

म देखिरहेछु

हजुरको च्यातिएको छाला

वर्षौँदेखि उस्तै छ

कहिले फेर्नुहुन्छ ?

लेखकका अन्य रचना पढ्न यहाँ क्लिक गर्नुहोस ।