आज किन त ठेकेदार साप् ?

कविता दिनेशराज पुरी May 16, 2014, 2:39 am

---

एउटा शुन्य परिवेश चिरेर

नेपाली माटोको अक्षता पैरी

सिंगापुरको सपना बाड्दै

ठेक्का लिएका हैनौ घर संहाल्ने ?

आज किन त ठेकेदार साप् !

तिम्रै आँखा अगाडी तिम्रो सिंगापुर

डोरी चुडिएको चङ्गा झै,

कानुनको टुहुरो बनी

मृत्युदिवस मनाइरहँदा पनि

तिमी सङ्लो उत्सवको

रातो चुरा पोते र बनारसी साडी पहिरिई,

करौडौँ जलेका छातिमाथि

पाइतालाको ‘शंखे’ ‘चक्रे’ डाम विच्छ्याउदै

निर्धक्क ! खुलेआम !

मारूनी नाच नाचिरहेछौ,

आज किन त ठेकेदार साप् ?

कुहिरोभित्र लत्पतिएकाको पंक्षी झै,

लत्पतिरहेछ सिङ्गो सुदूरपश्चिम !

आश्वासनको दूधे जञ्जिरभित्र

र पिउन विवश छ सिङ्गो पहाड !

मेरो देश र आमाको छातिमाथि

फुटेको ज्वालामुखीसँगै

उत्पादित धुवाका मुस्लाहरू !

आज किन त ठेकेदार साप् ?

तिम्रो शररार्थीय दिल्ली भ्रमणले,

तिम्रो कुर्सीको वजिलो लचकताले

यी नपुत्पुताएका झुप्रामुनी

एक अञ्जुली खोले फत्काउन सक्दैन ?

आज किन त ठेकेदार साप्?

धर्तीमा पसिना बन्दकी सुकाई

तिम्रो मुखमा अन्न ठोसिदिने,

तिम्रा पेटका पुजारीहरूलाई

पैसा बेच्दापनि एकबोरा मल ठेल्न सक्दैनौ ?

आज किन त ठेकेदार साप् ?

गृह कलहको रणाको मच्चाई,

धूरी र घरलाई भाग लगाई,

मुनाफाको दरबार कल्पेर

आफूलाई ‘क’ वर्गको ठेकेदार बोल्दै

लाजको कात्रोभित्र गुट्मुट्याईरहेछौ ?

आज किन त ठेकेदार साप् ?

सुनारपानी-९, रामेछाप, हाल: धोवीघाट

लेखकका अन्य रचना पढ्न यहाँ क्लिक गर्नुहोस ।