18 वर्षदेखि निरन्तर
समकालीन साहित्य
समकालीन साहित्य
म मरुँ, मेरो अस्तित्व मरोस् ??
भाग्यले ठगेको, कर्मले लखेटेको
दुखले घेरिएको, आँसुले भरिएको
षड्यन्त्रले जेलिएको, विवशताले पेलिएको
म मरुँ, मेरो अस्तित्व मरोस् ।
अमिल्दा रीतहरुमा
रुवाउने गीतहरुमा
तड्पाउने प्रीतहरुमा
थर्थराउने जितहरुमा
आँसु टप्काउने शीतहरुमा
म मरुँ, मेरो अस्तित्व मरोस् ।
डरत्रासले थलिएको
निराशाले ओइलिएको
मरुभूमिमा फैलिएको
डिप्रेसनले सताइएको
फ्रस्टेसनले लट्याइएको
म मरुँ, मेरो अस्तित्व मरोस् ।
आकाशमा न धर्तीमा
जूनमा न तारामा
विगत, वर्तमान न भविष्यमा
जल, तेज न वायुमा
मनमा न मुटुमा
ओठमा न आँखामा
कतै म न रहूँ
म मरुँ, मेरो अस्तित्व मरोस् ।
म मरुँ, मेरो अस्तित्व मरोस् ।
धुम्बाराही, काठमाडौं