18 वर्षदेखि निरन्तर
समकालीन साहित्य
समकालीन साहित्य
१ **
कस्तो यौटा कथाजस्तै भएको जिन्दगी किन
पल एकै यता कोल्टो अर्को कोल्टो उही छिन
उठेर जाउँ है ठान्छु, दाम्लो बाँधिन्छ पाउमा
सन्चो होला भनी ठान्छु चूक पोखिन्छ घाउमा /
२ **
नसोचेको वृथा हुन्छ सोचेको हुन्छ दुर्गम
नभए बरु यो हुन्थ्यो भन्यो, त्यै हुन्छ हर्दम
अभ्यस्तहरू छन् भाग्दै नगर्ने पर्छ जेलमा
धूर्तको जीतले काँडा मुटुमा हुन्छ खेलमा /
३ **
सोची मानव सेवाको काम क्यै गरुँ है भनी
हमेसा 'जस'को उल्टो फेला पर्ने पला गनी
गाली खाऊँ कति, राम्रो गर्न खोज्दा निरन्तर
अपमानहरू घेर्ने, बन्छु भन्दा धुरन्धर /
४ **
रोकिन्छु, अरूले जस्तै गर्न सक्दिनं कत्ति म
स्वभाव प्रतिक्रान्तिको लिई बाँच्दिन रत्ति म
नठान मित्रता मेरो कमजोरी किमार्थमा
बलशाली छु है साथी पर्दाखेरि यथार्थमा /