गजल

गजल गोपीकृष्ण ढुंगाना June 9, 2011, 5:50 pm

---

शान्त सुन्दर तलाउको पत्थर फोड्ने तिमी को हौ ?

अटुट हाम्रो विश्वासको शिशा तोड्ने तिमी को हौ ?

अलौकिक शुन्यतामा मौलाएको शीतल जुनलाई,

खहरे त्यो खोलाबीच एक्लै छोड्ने तिमी को हौ ?

काम लाग्दा लोटाएर कामपछि मिल्काइदिने,

चैटिएरनि टुटिसक्या नाता जोड्ने तिमी को हौ ?

वसन्त नि बिताइदिएँ वर्षाभरि भिजिरहें,

मेरो नाममा शरदमा छाता ओढ्ने तिमी को हौ ?

बाँच्नसम्म बाँचेकै थें, हाँस्न पनि हाँसेकै थें,

विशद् मेरो गन्तव्यको बाटो मोड्ने तिमी को हौ ?

आश्वासनको खडेरीमा ओइलाएको यो 'पथिक'को,

विना कुटो कोदालो नै माया गोड्ने तिमी को हौ ?

काव्य कुञ्ज, भक्तपुर

लेखकका अन्य रचना पढ्न यहाँ क्लिक गर्नुहोस ।