गजल

गजल दीपक जडित January 25, 2011, 8:47 pm

---

झन झन गाढिने भासमाथि उभिन्छन् कोहि ।

रोजाई आ-आफ्नो हो आसमाथि उभिन्छन् कोहि ।

हार असम्भव छ हुन जिन्दगी रहेसम्म,

बुझेर सहजै प्रयासमाथि उभिन्छन् कोहि ।

सन्नाटामा आँधिको अनुमान गर्न नसकी,

बनाएर महल तासमाथि उभिन्छन् कोहि ।

थाहा हुन्न आगोको गन्ध आगोकै खेती गर्दा,

त्यसैले त हाँस्दै कपासमाथि उभिन्छन् कोहि ।

कोहि उभिन्छन् प्रकाश छर्दै अँध्यारो धर्तीमा,

छाडेर धरती आकाशमाथि उभिन्छन् कोहि ।

लेखकका अन्य रचना पढ्न यहाँ क्लिक गर्नुहोस ।