18 वर्षदेखि निरन्तर
समकालीन साहित्य
समकालीन साहित्य
पर्दैन भो देख्दा मलाई, घरको दैलो थुन्न अब !
हाटबजार, चोक, गल्ली, कतै पनि हुन्न अब !!
सोचेजस्तै सप्तरंगी, हुन्न जीवन थाहा पाएँ !
सस्तो छैन आँसु मेरा, सम्झिएर रुन्न अब !!
सुख-दुःख आँसु-हासो, त्यसैले त जिन्दगी छ !
जति पीर परोस् अझै, आँसुले मन धुन्न अब !!
ढुक्क भई हिँड तिमी, छेक्नेछैन बाटो कहिल्यै !
सत्य-सत्य धरोधर्म, तिमीलाई छुन्न अब !!
होलान् दुःख तिम्रा पनि, मुटुभित्र चोट अनेक !
छाडिदेऊ षडयन्त्रका, अनेक ताना बुन्न अब !!
साँचो प्रेमको बदलामा, उपहास सहुँ कति !
तय गर मार्ग आफैं, दिएँ मौका चुन्न अब !!
औंसीमात्र कहाँ होला, पूर्णिमा नि आउँछ पक्कै !
विरहका मेरा भाका, पर्दैन भो सुन्न अब !!