18 वर्षदेखि निरन्तर
समकालीन साहित्य
समकालीन साहित्य
रोज्या थियौ मार्ग कठोर, यात्रा रोकायौ कि !
एक्लै छ्यौ कि तिमी अझै, भारी बोकायौ कि !!
अवसरवादी तिमी कति, अवसर पाइनौ कि !
खोज्दैछ्यौ कि अझै पनि, मौका चुकायौ कि !!
छेउमै पर्न को सक्थ्यो र, कति कट्टर तिमी !
उस्तै छ कि गर्जन अझै, गौंडा ढुकायौ कि !!
देखाइनौ तिम्ले कहिल्यै, पीडा जति परोस् !
उस्तै दरो छ कि मन, चित्त दुःखायौ कि !!
मुस्कान सधैँ मुहारमा, मन जति जलोस् !
उस्तै छ्यौ कि अझै पनि, हाँसो लुकायौ कि !!
स्वभाव कति हठी तिम्रो, गल्ती गरे पनि !
बानी उस्तै छ कि अझै, शीर झुकायौ कि !!
दोषी ठान्थ्यौ समाजलाई, आफू तल पर्दा !
डराउँछ्यौ कि अहिले तिमी, बन्धन फुकायौ कि !!
सपना अनेक थिए तिम्रा, पूरा नभए नि !
देख्नै छाड्यौ कि कुन्नि, मनमै सुकायौ कि !!