गजल

गजल लक्ष्मण गाम्नागे April 5, 2010, 8:33 pm

---

बूढा नेता बितिगए हामी जुठो बारौं साथी

बहाना भो आउँदो जेठलाई मंसिरमा सारौं साथी ।

बाँचुन्जेली मूर्दावाद र मर भनी सरापे नि

मरेपछि जिन्दावाद भन्दै अमर पारौं साथी ।

गोठाला ती गएपछि गोरुहरू डुक्रिंदैछन्

कुन गोरुको जुरो अग्लो जुवा बाँधी नारौँ साथी ।

जत्ति स¥यो उत्ति राम्रो सम्विधान लेख्ने कुरा

सिन्को एउटै नसारे नि तलवभत्ता दारौं साथी ।

छप्पन्न दिन अझै बाँकी सिङगासिङ्गै लडेका छन्

त्यतिन्जेली भैंसी पुज्दै लिखा जुम्रा मारौँ साथी ।

बहर छैन गोरु मात्रै गाम्नागेको अगजलमा

यसैलाई गजल मानी आजलाई टारौं साथी ।।

लेखकका अन्य रचना पढ्न यहाँ क्लिक गर्नुहोस ।