गजल

गजल बोधराज पन्त February 24, 2010, 8:10 pm

---

शंका लाग्छ आफैलाई ज्यूँदो लाश हूँ कि म ?

निर्जन कुनै मरुस्थलको हुरी बतास हूँ कि म ?

ख्वै अस्तित्व आफ्नोपनको नहुनु या हुनु के हो

आँधी संगै उडि राख्ने भूवा कपास हूँ कि म ?

टाढा टाढा शुन्यता यो क्षितीज पारी के छ के छ ?

नगर्जिने नबर्सिने बाँझो आकाश हूँ कि म ?

न गन्तब्य न मन्तब्य त्यसै त्यसै हिंडि रे’छु

तिर्नु पर्ने नतिरेको बाँकी हिसाव हूँ कि म ?

के हूँ ? को हूँ ? कसरी हूँ ? किन हूँ ? म थाहा छैन

म छु, छैन ? भन, कतै रित्तो आभाष हूँ कि म ?

मणिग्राम, रुपन्देही ।

लेखकका अन्य रचना पढ्न यहाँ क्लिक गर्नुहोस ।