18 वर्षदेखि निरन्तर
समकालीन साहित्य
समकालीन साहित्य
बाहिर चर्को घाम छ कमरेड
समस्यै समस्याको जाम छ
धुलो, धुवाँ र दुर्गन्ध छ
हुलदङ्गा, लूटपाट र नेपाल बन्द छ
सुती ऽऽऽऽऽ रहनुहोस् कमरेड मायालुको अङ्गालोमै
बाहिर निस्कनु कमरेडको स्वास्थ्यका लागि हानिकारक छ ।
भित्र छ बोत्तल भित्रै छ मात
भित्रै छ चौरासी व्यञ्जनको खात
भित्र छ सेमिनार, साँप्रा र सुकुटी
भित्रै छ देशको राष्ट्रिय ढुकुटी
टोकी ऽऽऽऽऽऽऽऽ रहनुहोस् कमरेड कुटुकुटु हाड
बाहिर निस्कनु कमरेडको स्वास्थ्यका लागि हानिकारक छ ।
बाहिर त बाढीमा डुबेका झोपडीहरू छन्
अनिकालले सुकेका कङ्काल र खोपडीहरू छन्
अदालत बाहिर छ, न्यायाधीशहरू भित्रै छन्
कानून बाहिर छ, वकीलहरू भित्रै छन्
बाहिर त फुटेका खुट्टाहरू मात्रै छन् कमरेड
टोपी लगाएका टाउकाहरू भित्रै छन्
बाहिर विपक्षीहरू मात्रै छन् कमरेड
समकक्षीहरू भित्रै छन्
जमी ऽऽऽऽऽऽऽऽ रहनुहोस् कमरेड म्यारिजमै
बाहिर निस्कनु कमरेडको स्वास्थ्यका लागि हानिकारक छ ।
झण्डा भित्रै छन् कमरेड !
भित्रै छन् झण्डा गाड्ने चिल्लाचिल्ला गाडीहरू
भित्रै छन् गाडीमा अडेस लागेका किर्ना, उडुस् र ढाडीहरू
भित्र छ बण्डा भित्रै छ भाग
भित्र छ रति भित्रै छ राग
बाहिर निस्किसक्नु छैन कमरेड
दिउँसै पनि मध्यरात झैँ अन्धकार छ
भित्र रातमै पनि झल्झलाकार छ
थच्ची ऽऽऽऽऽऽऽऽ रहनुहोस् कमरेड ट्वाइलेटमै
बाहिर निस्कनु कमरेडको स्वास्थ्यका लागि हानिकारक छ ।