भीरको चिण्डो

कविता डा. नवराज सुब्बा January 8, 2010, 9:59 pm

---

तेञ्जिङ शेर्पा खोज्दै

चुचुरो चढ्दा

यस्तो लाग्यो

यो त

भीर पो रहेछ

एउटा नमीठो पीर

जहाँ म जन्मे, बढें

र कहिले अलि माथि पुगें, हाँसे

घरिघरि लडें अनि रोएँ

तैपनि आजसम्म

भीरदेखि डराएर म कतै भागिन

माया मारेर अन्यत्र पनि लागिन

निरन्तर चढें, बढें, र

अन्ततः फलें

एउटा भीरमा

चिण्डो भएर

र अड्किएँ पीरमा

कसलाई थाहा होला ?

मेरो अवतरण या मेरो मृत्यु

अनि यो भीर या पीरमा

के फरक छ ?

अनि हाम्रो

गन्तव्य र चिण्डो

किन उस्तै उस्तै देखिन्छ ?

nrsubba@hotmail.com

लेखकका अन्य रचना पढ्न यहाँ क्लिक गर्नुहोस ।