गजल

गजल संगम सापकोटा January 6, 2010, 11:19 pm

---

पिरतीको गोरेटोमा अव, म लाग्दै लाग्दिन

यो दिल थापी मायाको, भिख म माग्दै माग्दिन

जे को होस् न नशा, वानी परेपछि छाड्न गाह्रो

सधैं त्यो नपुगेपछि, मिठो म चाख्दै चाख्दिन

हँसाउने कहिले रुवाउने, जात रे यो माया

पिरतीको सुन्दर जीवन, म डाक्दै डाक्दिन

भावनाको सागरमा, पौडिएजस्तो हुन्न जीवन

सगरका तारा झार्ने कुरा, म हाँक्दै हाँक्दिन

छोडिन सक्छ दोवाटोमा, माया मोडिन सक्छ

कसैलाई मागेर, देउता म भाक्दै भाक्दिन

न भोक दिन्मा न रात्मा निद्रा, यो प्रेम रोगमा

कसैलाई सजाई, यो दिलमा राख्दैै राख्दिन

डुबेको धेरै देखें, उत्रेको चाँही देखिन फेरी

त्यसैले प्रितको सागर, म नाघ्दै नाघ्दिन

जाने पिरती जीउने खेल, नजाने वगाउने भेल रे

विचलित हुनु रुनु पर्छ, सत्य यो ढाक्दै ढाक्दिन

दमौली,तनहुँ

लेखकका अन्य रचना पढ्न यहाँ क्लिक गर्नुहोस ।