म बाँचे भने भगवान मर्छ

कविता उमेश राई 'अकिन्चन' July 11, 2009, 1:20 am

---

एक हरफ शब्दले

संसार जित्न खोज्ने

ए कवि !

कोर एउटा

नानी रोएको आवाजजस्तो कविता

छापामारको कैमोफ्लेज लुगाजस्तो

टाटे पाङग्रे

विश्वको नक्सामा

ए भिक्षु !

विपरित बहिरहेछ हावा

उल्टो फरफराइरहेछ झण्डा

फर्काउ

पानको पात पाइला नाघेर

सिमाना काटिरहेका

घामलाई

कि त रोएर

कि त हाँसेर सकिने

जिन्दगीलाई

यसरी जोड

ए दार्शनिक !

पुथ्वी घुमे जस्तो

फेरि फेिर

नदोहोरियोस्

कलिलो फूलको गुनासो

'म मरे भने भगवान बाँच्छ

म बाँचे भने भगवान मर्छ' ।

लेखकका अन्य रचना पढ्न यहाँ क्लिक गर्नुहोस ।