पहिले केटाकेटी माटोमा खेल्थे

- लक्ष्मी उप्रेती

पहिले केटाकेटीहरू शरिरभर माटो दलेर रमाउथे
लडिबडि खेल्थे र माटैमाटो हुन्थे अनि
त्यहीँ माटोको ओक्षानमा घुप्लुक्क निदिउथे
माटोलाई माया गर्न पाए रमाउथे
त्यसबेला माटोमा खेल्दा उनिहरू फोहरि हुदैनथे
माटोको सुगन्धले उनिहरू बिरामी पनि पर्दैनथे ।

उनिहरूले टेलिभिजनमा काटुन हेर्न पाएनन्
बजारबाट अनेक थरि खेलौनाका लागि
बुबाआमासँग माग गर्न जानेनन्
उनिहरू माटोमा नै खेल्न पाए रमाउथे
मेरा छोराछोरीले माटोमा रमाउदै
माटोमा खेलेको पल सम्झिरहेछु
अनि उनीहरू गर्भमा हुँदाको मीठासमा
माटोको सुगन्ध मिसिएको अनुभूत गरिरहेछु ।

त्यो समय जस्तो छैन आजको समय
अहिले माटो बिषादी बनिसकेको छ
माटोमा खेल्न र माटोमा हिड्न नै वर्जित छ।

अनि त यसबेला छोराछोरीले बुबाआमासँग
बजारका महङ्गा खेलौनाको माग गर्छन्
घरमा झगडा नै गरेर टेलिभिजनका
कार्टुनमा दिनभर झुत्ति खेलिरहन्छन्
अनि आफुसँगै अरूलाई पनि
कार्टुन हेर्न वाध्य बनाउछन्
अहिले माटोमा खेल्दा ठूलो नै बित्यास पर्छ।

प्रकाशित मिति : प्रकाशन मिति : आईतबार, 9 कार्तिक, 2077

लेखकका अन्य रचनाहरु