म इतिहास बाँचिरहेको छु

- बैद्यनाथ उपाध्याय

इतिहासमाथि उभिएर
म पाहाड लम्किरहेछु।

त्यो अग्लो
भिरालो पाहाडको चट्टानबाट
एउटा बिरूवाले पालुवा हाल्दैछ
आफैंलाई थेग्नलाई
चट्टानलाई जकडेको छ
आफ्ना जराहरूले।

त्यो पाहाडको चट्टानमा
कहाँ मल-जलको सवाल?

शुष्क मौसमको चर्को घाममा
निस्फिक्री हुर्किरहेको
त्यो बिरूवाले
गरेन कुनै गुनासो
सृष्टिकर्ता सँग
गरेन प्राप्ति-अप्राप्तिको
कुनै लेखा जोखा
खुसी खुसी
आकाश लम्किरहेको
त्यो बिरूवा
अरू कोहि हैन
म नै हूँ।

पाहाडको विकट चट्टान फोरेर
म इतिहास बाँचिरहेको छु।

प्रकाशित मिति : प्रकाशन मिति : मगलबार, 16 भाद्र, 2077

लेखकका अन्य रचनाहरु