देशको बन्छ माटो

- काशीनाथ मिश्रित

(मालिनी छन्द)
समथर जुन जग्गा अन्नभण्डार हुन्थ्यो
सबतिर घर बन्दा वेदनाग्रस्त बन्दो
धुरुधुरु किन रोयो? नेत्रमा देख्छु टाटो !
अब भन कसरी यो देशको बन्छ माटो??

अनवरत लडेका ती पहाडी किसान
अविरल झरि पर्दा मेटिँदै छन् निशाना !
सलल सलल बग्दा उर्वरायुक्त माटो
दिन दिन दिन रूखो देशको बन्छ माटो ॥

बुझ न जति विदेशी वस्तुमा मोह हुन्छ
खरिद गरिरहन्छौ देशको आत्म रुन्छ ।
टिमुरसित मकैको खान के हुन्छ आटो?
जब सहमत हुन्छौ देशको बन्छ माटो ॥

फलफुल, तरकारी, दूध, माछा र मासु
कृषक दिन नसक्दा प्युन पर्दै छ आँसू !!
सहज मुलुकभित्रै बन्दछन् किन्नु साटो
अब फलफुल रोपौँ देशको बन्छ माटो

चिजबिजहरु आफ्नै देशभित्रै बनेका
चलन गर चलेका चाड-संस्कार मान्दा ।
चलनहरू पुराना फेरिए खुल्छ बाटो !
असहमत भए के देशको बन्छ माटो??

युवक त परदेशी भै उतैतर्फ हल्ले !
जमिन छ अति धेरै काम गर्दैन जल्ले
श्रमजिवि जनताको खोस्रने छैन पाटो
यति विथिति सुधारे देशको बन्छ माटो ॥

दिनदिन झगडाको गन्ध आइरहेछ
समय मिलन होओस् भन्न चाहिरहेछ !
मनन गर छ इच्छा शत्रुको देख्न फाटो
मन मगज सुधारौँ देशको बन्छ माटो

मल-जल-पसिनाले सिञ्च यो भूमि भन्छ !
तन-मन-धन खर्चे देश यो स्वर्ग बन्छ !!
किन किन खुकुलो भो एकताबद्ध गाँठो?
अविरल कसिएमा देशको बन्छ माटो ॥

प्रकाशित मिति : प्रकाशन मिति : मगलबार, 2 भाद्र, 2077

लेखकका अन्य रचनाहरु