बिर्स जीवनका कथाहरू

- विनयकुमार शर्मा नेपाल

बिर्स जीवनका कथाहरू
बिर्स जीवनका व्यथाहरू
बिर्स जीवनका घटना दुर्घटनाहरू
हिजो जो भए,
जो थिए सबै सबै बिर्स ।

ऊ हेर त, पूर्व क्षितिज जगमगाएको छ
यही वेला तिमी पनि जाग र उठ उठ्नु
तिम्रो लक्ष हो उठ्नु
तिम्रो उद्देश्य हो उठ्नु नै
तिम्रो जागरण पनि हो
जागरूकताको बोध
तिम्रो मार्गको मोड हो
निडरता, निर्भयता र निरन्तरताको बोध
तिम्रो मार्गको सिँढी हो
रहर र ईच्छा शक्ति जगाउ
अनि सङ्कल्प साध र उठ
मिहिनेत, क्षमता र दक्षता
तिम्रो मार्गको खुड्किला हो
सीप, शक्ति र व्यवहारकुशलता
आत्मविश्वास, ज्ञान, बुद्धि र विवेक
तिम्रो मार्गको निचोड हो
सफलता त मान्छेको
मान्छेकै हातमा छ ।

मोड एउटा स्वस्फूर्त आउँछ
र मान्छेलाई मान्छेका
विचार परिवेशलाई मोड्दछ
मोड अर्को तिम्रो बोधले,
जागरण र परिश्रमले तिम्रो खुसीले,
तिम्रो ईच्छाले तिम्रो चाहले
तिमीद्वारा आउँछ
तिम्रा विचारले
तिमीद्वारा आएको मोड
स्वस्फूर्त आएको मोडभन्दा
हजार गुना उत्तम हुन्छ, उत्कृष्ट हुन्छ ।

त्यस वेला तिमीले
आफ्ना पुराना विचार छाड्न सक्नुपर्छ
थोत्रो आडम्बर र नौटंकी त्याग्न सक्नुपर्छ
अनि
मोड जाबो त
तिम्रै वशको कुरा न हो ?
मोड जाबो त
तिम्रै हातको कुरा न हो ?
त्यसपछिको सारा संसार तिम्रै हो ।

प्रकाशित मिति : प्रकाशन मिति : बिहीबार, 2 बैशाख, 2073

लेखकका अन्य रचनाहरु