बाघ गर्जेपछि

- जेबी खत्री

बाघ गर्जदा
वारी गाउँ भयभित हुन्छ ।
हावाले पात हल्लँदा पनि
मन सशङ्कित हुन्छ ।
मनमा डर पसेपछि न यस्तो हुन्छ ।
देशभक्तिका कुरा गर्नेहरु
देश सङ्कटमा पर्दै गएपछि
सेलाउँदै जान्छन् ।
कहीँबाट सञ्चालित भएजस्तो
हाम्रो देशभक्तिको नारा
राष्ट्रियताको पक्षमा
उर्लिएको जनधार पनि
समुद्रको छाल जस्तो
किनारालाई छोएर
त्यसै बिलाएर जान्छ ।
जिम्मेवारी आफूमाथि
आएपछि काँध खसाउँछन् ।
पछि पर्छन् देशभक्तिका कुरा
ओझेल पर्छ राष्ट्रियता
सुस्ताउन थाल्छ स्वाधिनता
र हाबी हुँदै जान्छ
ब्यक्तिगत स्वार्थ
यस्तै हुँदै आइरहेको छ पहिलेदेखि
र अहिले पनि यस्तै भइरहेको छ ।
किनभने
बाघ गर्जेपछि
सबैको मन
थर्कन्छ नै ।

प्रकाशित मिति : प्रकाशन मिति : शुक्रबार, 14 कार्तिक, 2071

लेखकका अन्य रचनाहरु