म ढल्न सकिन

- राजकुमार कार्की

थोपा थोपामा म गल्दैछु

शिखा झारेर म जल्दैछु

तिम्रो नश नशमा

चेतना प्रवाह गर्न

मैले आँधिलाई पनि झेल्दैछु ।

 

हो म तिम्रो प्रकाशकुञ्ज बनेर

थोपा थोपाहरुमा गल्दैछु

कहिँ जल्दैछु कहिँ बल्दैछु

शिखाहरुमा रुपान्तर भएर

साँच्चै हो मेरो जीवन

तिम्रो नाममा अनुवाद गर्दैछु

 

तिमीले चाँडै ढल भन्यौ

तिमीले चाँडै गल भन्यौ

तर अहँ, म चाँडै बल्न पनि सकिन

तिमीले भने जस्तै ढल्न पनि सकिन

जीवनको प्रक्रिया  

आखिर यस्तै नै हुँदोरहेछ

 

म शनै-शनै जलिरहेको छु

म शनै-शनै बलिरहेको छु

ढल्नु मेरो स्वाभिमानको विरुद्ध हो

यसैले तिम्रै लागि म क्रमागतः बलिरहेको छु ।

 

(यो कविता विस्थापित जीवनमा अन्तर्भुक्त भएपछिका कहालिलाग्दा क्षणहरुको स्मरण गर्दै २०६३ माघ ३ गते प्रवासमा लेखिएको हो।)

 

प्रकाशित मिति : प्रकाशन मिति : सोमबार, 16 बैशाख, 2065

लेखकका अन्य रचनाहरु