प्रभो तपाई तेश्रो आँखा खोल्नुहोस

- ओमप्रसाद घायल

प्रभो
तपाई बर्षौदेखि यो कस्तो अनन्त ध्यानमा हुनुहुन्छ ?
हामीले तपाईलाई बुझ्न सकेनौं
हामीले देखिरहेका छौं
प्रभोको न्यायको शिविरमा
निरन्तर अन्यायको श्रृङ्खला ।
अनर्थ हुँदैछ प्रभो
तपाई आफ्नो तेश्रो आँखा खोल्नुहोस ।

प्रभो तपाईको दायाँतिर छन्–नन्दी र भृङ्गीहरु
तपाईको वायाँतिर छन्–चतुषष्ठी योगिनीहरु ।
तर त्यही तपाईको अघि बसेर
तपाईका प्रति हामीले गरेको आरधनाको
उनीहरुले गिल्ला गरिरहेका छन् प्रभो ।
तपाईका एकथरी भक्तहरुबाट
हामी अर्काथरी भक्तहरुलाई
आक्रमण शुरु भएको छ
हामी विपद्मा पर्‍यौं प्रभो
तपाई आफ्नो तेश्रो आँखा खोल्नुहोस ।

प्रभो तपाईको आदेश पाएर
आज एकथरी हामी जस्तै कुमारहरु
सुमेरु पर्वततिर दौडिरहेका छन्
अर्का एकथरी चाकडीवाज गणेशहरु
तपाईको परिक्रमा गरिरहेका छन् ।
तर तपाईका वरिपरिका
नन्दीभृङ्गीहरु र चतुषष्ठी योगिनीहरुको सल्लाहमा
कुमारहरुको त्याग विर्सेर
तपाई तिनै चाकडीवाज गणेशहरुलाई
प्रथमपूज्य घोषणा गरिरहनु भएको छ ।
प्रभो तपाईको धार्मीक शिविरमा
यो अन्यायको श्रृङखला
दोहोरिएको छ प्रभो
तपाई आफ्नो तेश्रो आँखा खोल्नुहोस ।

तपाईको शिविरमा
भक्तहरुको हिसावकिताव छैन
पाप र धर्मको मूल्याङ्कन छैन
तपाईको अघि भष्मासुर आएर तपस्या गरेपनि
रावण र तारकासुर आएर तपस्या गरेपनि
तपाई अनवरत तथास्तु भनिरहनु भएको छ
र तपाईको वरदान पाएर
शक्ति उन्मत्त भएका भष्मासुर र तारकासुरहरुले
हामीमाथि आक्रमण गरिरहेका छन् प्रभो
तपाई आफ्नो तेश्रो आँखा खोल्नुहोस

प्रभो तपाईलाई लाग्दो हो
भक्तहरुको यो पाठशालामा
देवगण/ राक्षसगण
सबै तपाईका भक्तहरु हुन भनेर
सायद त्यसैले पनि तपाई
भक्तहरुको यो द्वन्द्वमा नपर्ने वहानामा
तपाई निरन्तर आँखा चिम्लेको अभिनय गरिरहनु भएको छ ।
तर प्रभो
एकदिन भष्मासुरले तपाईको भक्त भएर
‘म जसको टाउको छुन्छु त्यसको टाउको पड्केर
भष्म होस्’ भन्ने वरदान माग्यो
रपनि तपाई नि:शन्देह वरदान दिनुभयो ।
प्रभो †
यसरी नै तपाईका तथास्तुहरुले
देवताहरुको बास उठाएको छ
मय र मृदुनमालीहरुको विल्लीवाठ बनाएको छ ।
प्रभो
तपाई त्रिकालदर्शी
भूत, वर्तमान र भविस्यको ज्ञाता
तर अब तपाईलाई पनि
चेतना भया हाम्रो आराध्य †
तपाईले नै दिएको वरदानको अस्त्र लिएर
यतिखेर बलउन्मत्त भष्मासुर
तपाईकै शिर छुन दौडिरहेको छ ।
ध्यान भंग गर्नुहोस प्रभो
तपाई आफ्नो तेश्रो आँखा खोल्नुहोस् ।

बलेवा,बागलुङ

प्रकाशित मिति : प्रकाशन मिति : आईतबार, 23 भाद्र, 2070

लेखकका अन्य रचनाहरु