गजल

- भाष्कर काजी

तिम्रो साथदेखि डर लाग्छ
उग्र मातदेखी डर लाग्छ ।

साँच्चि, नढाँटेर भनु भने
तिम्रो जातदेखि डर लाग्छ ।

त्यसै, हावा बिनै हल्लिराख्ने
वृक्षको पातदेखि डर लाग्छ ।

आफ्नो, धरातलै बिर्सीदिने
मनुको औकातदेखि डर लाग्छ ।

कुन्नि ! के ल्यायौ एसपटक
तिम्रो सौगातदेखि डर लाग्छ ।

मलाई, उज्यालो प्रिय लाग्छ
अचेल रातदेखि डर लाग्छ ।

रुँघा ७, रुकुम

प्रकाशित मिति : प्रकाशन मिति : शनिवार, 18 जेठ, 2070

लेखकका अन्य रचनाहरु