स्पेयर पार्टस्

- कृष्ण बजगाईं

गरिबहरूको रोजीरोटी बन्द अर्थात् नेपाल बन्दका दिन ज्याला मजदुरी गर्नेहरू चोकको एक कुनामा जम्मा भए । भरे साँझ के खाने, बच्चाहरूलाई के भनेर सम्झाउने भन्ने चिन्ताले ग्रस्त थिए । अनिश्चितकालीन नेपाल बन्दको खबरले झन चिन्तित भए तिनीहरू ।

“गत महिनामा मात्र मैले दुईपटक खुन बेचेँ”— रिक्सा चलाउने रामेले भन्यो ।

“पोहरसाल त हो मैले एउटा मृगौला बेचेको”— ठेला चलाउने हर्कबहादुरले सुनायो ।

“केही महिनाअघि मैले पनि एउटा आँखा बेचेँ नि”— भारी बोक्ने धनबहादुर बोल्यो ।

“मैले पनि भर्खरै पाठेघर बेचेँ”— दाउरा बेच्ने मनमायाले भनी ।

“साला जिन्दगी ! चाडबाड आउन लाग्यो । छोराछोरीहरू रोगी पिलन्धरे छन् । सम्पत्तिको नाममा यही एउटा ज्यान मात्र बाँकी छ । अब खै के बेच्ने ? हामी गरिबहरू धनीमानीहरुका स्पेयर पार्टस् को रूपमा पो जन्मिएका रहेछौं हगि !”— हर्कबहादुरले तितो ओकल्यो ।

प्रकाशित मिति : प्रकाशन मिति : मगलबार, 24 श्रावण, 2068

लेखकका अन्य रचनाहरु