गीत

- चैतन्य अधिकारी 

यी बोटहरुको जुर्मुराहट हेर
सुक्ष्म ओठहरुको चुलबुलाहट हेर
मग्न माधुर्य, मन्द मुस्कुराहट हेर
नौलो संसार नियाल्ने कुत्कुत्याहट हेर

यी पातहरुको सर्सराहट हेर
सुक्ष्म हातहरुको चल्मलाहट हेर
रंग, लालित्य, रौनक, रुन्झुनाहट हेर
एक बहार बसंत बाँच्ने चाहट हेर

यी खोली, तरेली कल्कलाहट हेर
यी निश्चल परेली सल्बलाहट हेर
सुर, सौन्दर्य, स्वप्न, सुस्त-आहट हेर
यो मायाँ यो छायाँ भुल्भुलाहट हेर

यी पक्षीहरुको चिर्बिराहट हेर
प्यारो गुंड, प्रभाती तिल्मिलाहट हेर
ठण्डी रात र बर्षात, जूनको राहत हेर
चर्को घाम र तूफान झेल्ने साहस हेर

यो मौसम र मेरो तुल्बुलाहट हेर!
यी शब्दैपिच्छेका घबराहट हेर!
यो शान्त कलमको लड़खडाहट हेर!
एक बहार बसंत बाँच्ने चाहट हेर

प्रकाशित मिति : प्रकाशन मिति : बिहीबार, 29 बैशाख, 2068

लेखकका अन्य रचनाहरु