चेकिङ

- कपिल लामिछाने

एक्काइसौं शताब्दीको प्रथम प्रहर !

देशमा सङ्कट थियो । तार, ढुङ्गा, मुढा, टायर राखेर राजमार्गलार्र्ई ठाउँठाउँमा अवरुद्ध तुल्याइएको थियो । आउजाउ गर्न सारै असुविधा थियो । ठाउँठाउँमा हुने सुरक्षा–जाँचबाट यात्रुहरू आहत भएका थिए ।

भरखर एक ठाउँको सुरक्षा–जाँच सकेर बसहरू लामबद्ध भई राजमार्गमा गुडिरहेका थिए । अकस्मात् लामको अगाडि रहेको बस घचक्क रोकियो । क्रमशः त्यसपछिका बस, ट्रक, भ्यान, जिप र कारहरू पनि सडकमा रोकिए । राजमार्गमा लामो लाम लाग्यो । मानिसहरूमा जिज्ञासा र कौतूहल जाग्यो ।—

– फेरि चेकिङ !

– अरे ! फेरि चेकिङ ?

– कति चेकिङ ! ?

– भरखर भएको हो चेकिङ ! फेरि केको चेकिङ ?

– सरप्राइज चेकिङ होला !

– चेकिङ छ भनेर जानीजानी पनि कसैले ल्याउँछ ?.... बेबकुफ !

यात्रुहरूमा छटपटी सुरु भयो । गजब त के थियो भने उताबाट पनि कुनै वाहन आइरहेको थिएन । मानिसहरूमा थरिथरिका आशङ्का देखापरे ।–

– उताबाट कुनै गाडी किन आएन ?

– उता कतै पक्का मुठभेड छ होला !

– देश त पूरै ध्वस्त भयो !

– अँ यार, खतम ! नेताहरू सब खतम !

– केटाहरू पनि खतम !

टाइम–पास–गफ भइरहेका थिए । धेरै बेरपछि विपरीत दिशातिरबाट गाडीहरू आए । अगाडिको गाडी हिंड्यो । हाम्रो गाडी पनि हिंड्यो । अरू गाडी पनि गुडे ।

पछि पो थाहा लाग्यो, चेकिङ होइन रहेछ, बिरालाले बाटो काटेको रहेछ ।

आखिर चेकिङ त चेकिङ नै रहेछ ! हाम्रो विश्वासको चेकिङ !


प्रकाशित मिति : प्रकाशन मिति : मगलबार, 4 श्रावण, 2067

लेखकका अन्य रचनाहरु