गजल

- डिल्लीप्रसाद अधिकारी

जाडो याम बिताउन घाम साथी मेरो
मनै शीतल गराउने राम साथी मेरो ।

जिन्दगीमा ठक्कर खाएँ न्याय खोज्दाखेरि
न्यायसंगत बाँच्नलाई काम साथी मेरो ।

धोका खाएँ सबैबाट चोट लागे धेरै
सम्झनामा फेरि आज नीलो डाम साथी मेरो ।

सबैलाई खुशी पार्न सकिएन कसै
देवतालाई खुशी पार्ने धाम साथी मेरो ।

कमाएको नहोला क्यै आजसम्म मैले
गुमाएका जति जे छन् दाम साथी मेरो ।

आफैंलाई रित्याएर खुशी बाढ्दै हिडें
दुखी बनाउने रित्तो खाम साथी मेरो ।

रमाउनै नसकेको ए! डिल्लीप्रसाद
यदाकदा फर्किआउने सलाम साथी मेरो ।

प्रकाशित मिति : प्रकाशन मिति : शुक्रबार, 25 चैत्र, 2073

लेखकका अन्य रचनाहरु