फूलहरू

- अनुभव आत्रेय

फूलबारीका फूलहरू
आज बजार-बजार बिक्दा रै'छन्‌!
ए माली दाइ!
सुनेको सम्म थिएँ
देखेको आजकै दिन हो
एक-दुई होइन,
फूलहरू हजार हजार बिक्दा रै"छन्‌,
फूलबारीका फूलहरू
आज बजार-बजार बिक्दा रै'छन्‌!

साँढेहरूका आँखा छली हुर्किएका फूल
भमराका आँखी बनी फक्रिएका फूल
गमलाका गुलाब पनि
पलङका श्रृङ्गार पनि
मुना-कोपिला-फूल फूलहरू बढ्दा पनि
आँधी-बतास, घाम-पानी फूलहरू झर्दा पनी
फूलहरू अति कोमल
अनि, अति अति नै सस्ता रै'छन्‌,
फूलबारीका फूलहरू
आज बजार-बजार बिक्दा रै'छन्‌!

भो माली दाइ अति भयो,
अब त चुँड़ाइदेऊ जमानाका जञ्जीरहरू
रोपिदेऊ आगोका गोलहरू
हुर्काइदेऊ क्रान्तिका बीजहरू;
यहाँ फूलहरू ज्वाला फुलून्‌
यहाँ फूलहरू क्रान्ति फुलून्‌
किनकि, फूलहरू 'फूल' नै रहे
फूलले पनि मिच्दा रै'छन्‌
फूलबारीका फूलहरू
आज बजार-बजार बिक्दा रै'छन्‌!
***
- राबङ्ला, दक्षिण सिक्किम

प्रकाशित मिति : प्रकाशन मिति : बिहीबार, 20 माघ, 2073

लेखकका अन्य रचनाहरु