गजल

- श्रवणकुमार ढुंगाना

मलाई रुने आँशु देऊ, घाऊ धुने आँशु देऊ ।
सम्झनाको चिताग्नी यो निभाउने आँशु देऊ ।

रातभरी जुनेलीले तिम्रै बाटो हेरीबस्यो
कुर्दाकुर्दै आँखा पोल्यो, शित्याउने आँशु देऊ ।

सुखी हुन संसारमा किन्न पाइने के के होला
तिम्रो दु:ख सँग दु:ख बिसाउने आँशु देऊ ।

हिमालसँग सागरलाई आँशुले नै जोडेको छ
मनसँग मन जोड्न मनाउने आँशु देऊ ।

नजानेरै वोली-वचन मिठो, पिरो, तिखो हुन्छ
माफि देउ, तिमीलाई रिझाउने आँशु देऊ ।

प्रकाशित मिति : प्रकाशन मिति : शुक्रबार, 17 भाद्र, 2073

लेखकका अन्य रचनाहरु