सपथग्रहण

- सिल्लीराम

(व्यङ्ग्य कविता)


डट्डट् डट्डट् को पुत्र
डट्डट् डट्डट् को पोइ । सरी पति ।
डट्डट् डट्डट् ........... डट्डट् डट्डट्
चारपाँचलाइन डट्डट् डट्डट् को पिता
यो देशको सवभन्दा ठूलो बेरोजगार प्राणी ।

स्वास्नी, छरछरी, नातागोता,
आसेपासे र अन्य अखडम् बखडमप्रति
पूर्ण बफादार रही
सत्य निष्ठापूर्वक प्रतिज्ञा गर्दछु ।

पल्लाघरे कुलदेउताको नाममा कसम खान्छु कि,
हाम्रो ग्याङ र गुटमा निहित रहेको
खिचातानी, झैझगडा, तिगडमबाजी र खुराफातप्रति
पूर्ण बफादार रहँदै
‘मुल-भान्छे’ पदको कामकाज गर्न चाहन्छु ।

प्रचलित भान्छा सम्बन्धी कानूनको अधिनमा नरही
यस भान्छामा आश्रित तमाम भातमाराहरुलाई वास्तै नगरी
लाज र घिन, इज्जत र इमानको डरै नमानी
पक्षपाती र पूर्वाग्रही भावना लिँदै
बेइमानी र बदमासीपूर्ण तरिकाले भान्छा सञ्चालन गर्नेछु ।

भान्छेमण्डलका विजातीय सदस्यहरुलाई
नून लाग्या नलाग्या चाख्न, दुनामा झोल दिनेछु ।
भान्छेमण्डलका स्वजातीय सदस्यहरुलाई
पाक्या नपाक्या चाख्न, टपरीमै चौटा दिनेछु ।



जन्तालाई जन्तिजस्तै व्यवहार गर्नेछु
जन्तेबाख्रोको खल्लो झोल जति जन्तिलाई दिनेछु ।
हड्डी र छालाका टुक्रा चाहीँ आसेपासेलाई दिनेछु ।
फिला र ह्याकुलाका चौटाजति आफ्नै भुँडी भर्नेछु ।

भान्छागृहको गतिला गतिला भाँडाकुँडा
पछाडिको ढोकाबाट विस्थापित गराउनेछु ।
भण्डारगृहको गुणस्तरीय जिन्सीहरु
आफ्नै गुट र ग्याङको भण्डार भराउनेछु ।

बाक्लो दालमा घिउ झानेर ओरत्रको जन्तिलाई भान्छा गराउनेछु ।
नून-पानी थप्या दाल हालेर, माम्री लाग्या भात, परत्रका जन्तिलाई दिनेछु ।

भान्छे-कर्म गर्दा-गर्दै, रुघा-मर्की लागेमा पनि, विदेशी अस्पतालमा जानेछु ।
विदेशी भ्रमणटोलीमा, ५ जनाले हुने भए पनि, ५० जनाको जन्ति लानेछु ।

भान्छे जागीरको म्याद, सकभर लामो तन्काएर झुलाउनेछु ।
बढी तन्केर म्याद चुँडियो भने, आर्को भान्छेमण्डलीसंग साँठगाँठ मिलाउनेछु ।
साँठ र गाँठ मिल्यो भने, अर्को म्यादको भान्छे हुन,
फेरि, नाइस टु मिट यू गर्नेछु ।

भान्छाभित्र रहे खटपट गरिरहनेछु ।
भान्छाबाहिर रहे छटपट गरिरहनेछु ।
यो म्यादी जागीर खाँदा वा त्यसपछि पनि
बलबुताले भ्याएसम्म जालझेल र छलकपट गरिरहनेछु ।

सक्कल बमोजिम नक्कल ठीक छ ।
अक्कल बमोजिम चप्पल ठीक छ ।
दुवै कान देखिने हालसालै खिचेको फोटो,
त्यो पंक्तिको पल्लोछेउमा झुण्ड्याउनेछु,
नौ महिनामा पिन्सिन पकाउनेछु ।
सत्ताइस महिनापछि फेरि सपथ खान आउनेछु ।
साक्षी फड्के किनाराका सदर ।
इति सम्वत् २०७३ साल भाद्र मासे गाइजात्रा शुभम् ।

प्रकाशित मिति : प्रकाशन मिति : बिहीबार, 2 भाद्र, 2073

लेखकका अन्य रचनाहरु