गजल

- सीता प्याकुरेल

नाम खोज्छन् अरु म बदनामी खोज्दैछु ।
आफ्नो लागि कोही एक हरामी खोज्दैछु ।।

घाँटी दुख्दा पेट चिर्ने स्वास्थ्यसेवा देखेपछि ,
आफ्नै गाँउमा पसी झाँक्री , धामी खोज्दैछु ।।

मान्छेकै भीडमा मान्छे नदेखे'सी यी आँखाले ,
पट्टी बाँधी अब छामीछामी खोज्दैछु ।।

देश लुट्नेहरु सबै शहिद भा,को सपना देखेँ ,
खुसी हुँदै तिनका लागि मलामी खोज्दैछु ।।

अब मेरै काँधमा छ यो देशको अभिभारा ,
बेचिदिन्छु खरिदकर्ता दामी खोज्दैछु ।।

नीलकण्ठ न.पा.१, सीउँडीबार ,धादिङ्ग
हालः सातदोबाटो , ललितपुर ।

प्रकाशित मिति : प्रकाशन मिति : बिहीबार, 16 आसाढ, 2073

लेखकका अन्य रचनाहरु