चढेँ आइफेल !

- वासुदेव अधिकारी

सडक पेटीबाट कति पो देखिन्छ र पेरिस ?
कहाँ गएर सुन्ने राइन नदीको गीत ?
पेरिस घुम्दै गर्दा
घर घरबाट उदाए घाम
अत्यासले घेरिएँ म
प्रश्नै प्रश्नले बेरिएँ म
रहरको नदीमा हेलिएँ
उत्सुकताको छालमा समाहित भएँ
कलाको केन्द्र हेर्नु थियो मलाई
गणतन्त्रको नाभी छुनु थियो मलाई !

विकासको गुदी
स्वतन्त्रताको चमक
सबै सबै देख्न
सबै सबै छाम्न
हुर्रिएर गएँ म आइफेल नजिक
र चढाइको टिकट लिएँ

म आइफेल टावर चढेको
आफू अग्लिन होइन
गफ लाउन होइन
अभिमान गर्न होइन
केवल चुम्न
केवल छाम्न
केवल छुन
सत्यलाई
इतिहासलाई
गौरवलाई !

धरहरा नचढे नि
आइफेल टावर चढेँ म
(लज्जित छु त्यसप्रति)
हेरेँः पेरिसको भव्यता
सुँघेँः इतिहासको वासना
देखेँः वर्तमानको चहक
मोहकताले छोपिएँ म
सुन्दरताले किचिएँ म
र कल्पिन थालेँ
उसको बुढ्यौलीबारे
बुढ्यौलीबाट मुक्त हुन
उपयोग गर्ने औषधिको रसायनबारे !

प्रकाशित मिति : प्रकाशन मिति : बिहीबार, 6 जेठ, 2073

लेखकका अन्य रचनाहरु